1Ti 1 | GbrGAW | STEP | Wasika ye kwo gmi n Bulus akun nu, Waʼazi zhin yi Yesu Kristi nya, n Shekwoyi eyi gniyi n Yesu Kristi eyi Dagayi

1 Timothy 1

1 Wasika ye kwo gmi n Bulus akun nu, Waʼazi zhin yi Yesu Kristi nya, n Shekwoyi eyi gniyi n Yesu Kristi eyi Dagayi–eyi awyetu.

2 Kwoi lo Timatawus aba, Timatawus ɓei zhin ngye omi-ɓi nu dna n Dagayi. Fa Shekwoyi eyi Dada, N Yesu Kristi eyi Dagayi wa wu ho owo alheri n sun-sun gyei, wa ga ho bugba fu yakwo n ho bugba mi n ho nubo zhin yi.

Fye Na Abayi (Amalam) Katayi Ɓo

3 – 4 Shi mi ɓei da esa n mi ɓei lo Makidoniya nyi, la dna n Afisus ha zhin atna ha kma aza n ɓa wu nya akata nya nyi. Ku oɓa asita n ɓa abyetnuyi ce n ɓa nubo-zhinyi n ge a ɓa gni aza dna n na aɓe a desi n na malaikai ɓei sido n Shekwoyi abye n ɓato n na akpegnin bayin. Anubozhin n na aɓe mwi deye pya zhin ɓa la aɓena kala. Maimakon ɓa bma aza zhin ɓa gwo Shekwoyi shiri gaiciya ga nya. 5 Enya n kwo womi pwa lo kwonu ge a Yesu-viyi n ɓo vinya ɓa ku nu n ye-yei n kwo gmi n na bugba gyi-gyi-yi oɓa bemwi n gyi-gyi-yi, oɓa gaiciya ga kwa bwa kala.

6 Ama a malami deye ɓa ku bwi zokwo, ɓai gyi ɓahin esa, ɓai na aɓo, ɓai daɓo n tna ce-ce. 7 Ɓa ye a kpe ɓaye nge Musa a wyidnayi wuyi, ama ɓa ta kpe ye lo kwo fyewyi enya n na awyidna ye wuyi n. 8 Awyidna ye bmiya lo, yi ya zhin apma n ɓai shi Shekwoyi ɓemwi nyi. 9 Ama ato zhin ɓa n yi ɓonu m, n Shekwoyi gni-gni yi n, ntu n na laifi da ɓonu n ɓata ye Shekwoyi nyi n, ɓa n na abugba kala kpenya yi, ɓai tu ekni, ɓai si nyasi, ɓai zhin gaba n ɓa dadayi, n ɓa ayai, aza wuyi. 10 – 11 E, awyidna ye a zhin ɓa ntuge ɓa wu a alaifi da nu, a cegye da aza tna gyi-gyi-yi, n azai n ɓa wangye n na azanugbayi, aɓi wanyi, akata ceyi n na azayi n ɓa zhin oɓo n kwo gni apapa n Shekwoyi anabarkada Nabari manayi, n mi zhin wo tnutnu yi nyi.

12 Mi zhin Kristi Yesu eyi Dagayi godiya n mwa, shi wa kni mi ma zhin wo tnu-tnu yi, woi gami kala ma zhin wo ɓefyece. 13 Koda-yake mi ɓei zhin mi-i kpe Kristi eye agye, mi-i zan ɓa fazan, mi-i zhin ɓa ɓo n mi ɓa mi. Ama Shekwoyi wa gyemi sun-sun, gama mito ɓei kpe ɓe ye n mi zhin ntuge mito ɓei kpe Kristi ye n sayin. 14 O, eyi Dagayi, zhin alheri danu gama wa wumi shimi ɓa kpema wo, ma nu n Kristi Yesu yeyeyi. 15 Kwo zhin gaiciya nu, mi n cei pma lo aza vinya ɓa kpe ce ye, n ge Kristi Yesu wa ɓe anyi mi wa gni alaifi da, omi yi nu zhin oɓa esu. 16 Ama Shekwoyi wa gye mi sun-sun, n na bai Kristi Yesu wa zhin apma n miyi, wa wu shi wo zhin hakuri n na alaifi dayi, har n ɓa dnagmayi yi, n na abai, n ɓa ɓa kpe nge ɓa ɓa mi ɓabwa wye-wyeyi nyalo-nyalo nya. 17 Latu n mwamwayi ɓa zhin Shekwoyi nya nu nyalo-nyalo Amin. Wo nu zhin Esu esa vinya nya, n na ta gye won, woi ta shan fin, owonu zhin Shekwoyi gmanyi, n nunuyi n ɓeyekpeyi. Amin.

18 Nsaiye, Timatawus, omi-ɓi, omi gbe ga nyi n ho aba. Sun okun n kalai Dagayi okun, shi Dagayi gna n na annabi egbe nge ho ɓa zhin nyi. 19 La gaiciya ga shi n kalai dna n Kristi ha anubo-zhin ze agyi-gyi-yi, ha zhin oɓo n kpe ge kwo zhin ɓemana nu. Gama azaho n la oɓa anubozhin zungna ɓai zhin oɓo n ɓa kpelo ge kwo to bmiya lon, kwo to zhin ɓe wo-woyi nu shi ɓa ya ɓa gaiciya ga dna n Kristi, ɓai la Shekwoyi eye aɓo na lo nun. 20 Himinayus n Iskandari yi ɓa zhin misali nu n kwo ɓei lami ze tilas ma gaɓa n Shetan akun wa ta ɓa, har esa n ɓa ɓa tumwi to ɓa zhin Kristi eye vinyikwo dna m.